今屆立法會選舉提名，唔計今日，就重有兩日夠鐘截止報名，同往年唔同，今年好多候選人都按兵不動，甚或放出煙幕，等到最後先殺你一個措手不及，正所謂兵不厭詐，皆屬選戰戰術。
加上「十點前特首」鄭大班忽然被商台俞琤炒魷，揚言要加入戰圈，同大嚿陳偉業喺新界西拍住出選，局勢就更加混亂。
其實喺舊年十一月區議會選舉之後，已經有高人通風報信畀大班，話商台要郁佢，但係佢好難相信。封咪之後先知大鑊，因為佢冇向俞小姐請假，而係向蔡先生，咁俞小姐梗係唔多高興啦，加上黃毓民跟住不辭而別，佢已經知道一定會出事。
直至噚晚，大班重未決定去邊區出選，因為佢阿哥肯定係一部超級吸票機，比民主女神余若薇更厲害，佢去新西，班民主派人人自危，皆因大家票源太相近，𠵱家新西已經有八張名單，李卓人同梁耀忠重未報名，加埋大班，一定十國咁亂。
大班都係要等到最後一刻鐘先宣布去向，不過睇怕楓葉國唔會玩佢，會畀佢盡快放棄加籍。而長毛就話自己錢少，太早報名容乜易被胡官計到足，咁就分分鐘要搵水填數，所以叫大家耐心等一等，佢重話，「香港同佢都應該都係時候有所改變啦。」
長毛同阿牛今年會唔會乘7.1之利入局八方唔知，不過，大班一旦出選，贏面一百零一巴仙。
有人笑話，如果大班加長毛加阿牛呢個「煎釀三寶」組合九月齊齊勝出，咁立法會就好玩啦。
於是有唔少好心人就叫八方勸佢哋三思先好出馬。好似大班咁，入咗局就要守規矩，雖然有權力及特權法保護，但係都唔可以好似開咪咁free，可以任意質人同抦人；重有，發言要限時限刻，每人只准講幾分鐘，一啲都唔過癮；最後講到錢就更唔吸引，只有五萬大元，何必咁辛苦呢？
俞琤今次用歪理郁大班，又笑毓民同大飛係逃兵，搞到商台過去光輝抗共嘅歷史一朝喪，連創辦人何佐芝都話唔知點收科，咁你好難叫一個八十五歲，已經退晒休嘅老人家嚟同佢兩個人講道理，雖然佢肯定有權。
至於毓民行蹤，八方有位老友報料，話最近由三藩市返香港，喺美國登機嘅時候話見到一個人，個樣好似毓民，一齊喺度等上機，但係佢返到香港赤鱲角機場，就見唔到佢嘅蹤影，後來諗吓，當時重有一班機去台灣，莫非佢去咗去寶島等做手術兼隔岸觀火？
傳真︰2623-9278
電郵︰