自從阿爺進行宏觀調控以來，內地的地產市場首當其衝，絕大部份的大陸地產股，尤其係上海地產股，就更加冇運行。在年頭上市，由大摩做保薦人的上海復地（2337）亦唔例外。
復地阿媽係大陸著名的民營企業，擁有唔少上市公司，本來就係財雄勢大一類，但內地今年以來，接連有民企股爆煲，作為民企股嘅龍頭，復地阿媽難免受影響，多個月來都有唔少關於佢哋嘅不利傳聞。
阿仔復地嘅股價，亦由年頭最高2.90元水平，直插至最低的1.36元，近排則好番多少，上周五升2.8%，收1.79元，成交股數1092萬股，金額1958萬元，但仍然低於2月上市時的2.35元招股價。
不過經紀黃話，復地阿媽在大陸多次否認不利傳聞，而大摩亦多次出報告力撐復地，揚言佢阿媽喺大陸嘅投資好穩陣，而復地股價又遠低於所持有的地產投資價值，講明唔會放棄支持復地。
復地將於8月10日公布中期業績。經紀黃話，據聞業績唔會差，或會對疲弱股價有多少刺激。
慕容小初