有報道指楊紫瓊和鍾再思決裂，鍾再思否定以上消息，而令他最介意的，是報道還指他三年來一直阻止楊紫瓊拍荷李活片，他說：「楊紫瓊嘅靈魂，唔係控制喺我鍾再思手上！」
昨日有台灣傳媒報道，指楊紫瓊和鍾再思徹底決裂，而兩人合組的神話電影製作公司瓦解，電影《花木蘭》亦由章子怡頂替楊紫瓊，更說近三年來，一直有荷李活片找楊紫瓊拍，卻被鍾再思推卻，所以華人女星第一把交椅亦拱手讓了給章子怡，現時兩人分手，楊紫瓊再闖荷李活，接拍史提芬史匹堡監製的《藝伎回憶錄》。
對於以上傳言，身在上海的鍾再思昨日在電話中說：「私人事我以前唔講，𠵱家亦唔會講，所以分手傳聞我唔評論。我只可以話，楊紫瓊以前係我工作夥伴，𠵱家仍然係，神話到𠵱家仍然存在，所以公司瓦解嘅傳聞不攻自破。」
鍾再思續說：「我非常欣賞章子怡嘅才華，但係暫時完全冇聯絡過，楊紫瓊係套戲嘅監製一定唔會變，至於佢係咪做女主角，我哋兩個都會對事不對人去決定，但係開拍呢個角色，正常人都會第一時間諗起楊紫瓊。」
令鍾再思最介意的，是報道指他阻止楊紫瓊拍荷李活片，他說：「咁多年冇一個人可以阻止楊紫瓊做佢想做嘅嘢，包括我，我亦冇咁做，我哋互相尊重，亦都欣賞對方有自己嘅思想，楊紫瓊嘅靈魂，唔係控制喺我鍾再思手上。佢未識我時已經好成功，但我哋創立公司，佢唔想掛個名，樣樣嘢落手落腳，我哋兩個都付出咗好多時間同精神喺呢間公司。」
鍾再思續說：「至於話電影《天脈傳奇》同《飛鷹》票房唔理想，我哋已經盡咗力，唔會覺得有任何羞澀。呢篇台灣報道完全冇向我哋兩個當事人求證，手法好另類，喺精神上對我好唔公平。」
神話附屬的內地公司和環球唱片合作，現時在上海製作電視節目《萊卡我型我Show》，類似美國的《一夜成名》，鍾再思表示覺得內地電視發展潛力無限，所以公司除了開戲外，亦會花多些時間在電視製作上。
採訪：張止寒