合和實業主席哥頓胡應湘（圖），就灣仔起摩天酒店MegaTower嘅計劃，上星期去城規會要求覆檢，點知又俾城規會施以「拖」字訣，決定押後審理，下星期合和會收到城規會嘅會議紀要，到時合和要就住嗰份紀要，提供相關資料。
既然本港投資要應付咁多麻煩，飛俠實行轉戰濠江。合和同賭王何鴻燊旗下嘅信德，喺澳門有個地產合作項目濠景花園。其中第二期嘅動土禮噚日喺澳門舉行，胡應湘喺動土禮後，同傳媒講開喺香港嘅投資時一肚氣，但講到澳門就讚不絕口。
佢重話自己五十年代已經過大海，但唔係去賭，而係去踩單車，佢話最鍾意係澳門充滿地中海同葡萄牙風情。至於佢踏足澳門商界，則是七十年代嘅事。喺濠江做生意，點可以唔識賭王燊哥，歌頓話：「62年已經識燊哥，不過我冇佢咁好豔福」。
計八方話，咁只不過係歌頓夠專一啫，就好似佢戴緊嘅嗰隻腕表，係Casio出品，歌頓話，已經戴咗好多年，因為佢唔鍾意戴靚表。
傳真︰2623-9278
電郵︰