中芯國際（981）周五公布第二季純利2.67億元，連續三季錄得盈利，中芯只升一格。但同一晚，中芯喺美國掛牌預託證券（ADR，編號：SMI）表現甚佳，留意挾完美國SMI，大戶隨時轉頭，再掃香港隻「981」。
事實上，中芯純利超預期，股價理應有表現，但可能礙於近期外資睇淡半導體行業，投資者入晒腦，影響到中芯香港表現。殊不知，原來大戶喺美國首先發力。上周五晚，中芯喺美國ADR升0.43美元，見10.84美元，成交高達114.6萬股，可見中芯ADR唔似其他紅籌國企股ADR，每日得幾宗成交嘜價盤，實情中芯ADR大戶參與相當活躍，股價有表現，屬大戶真係睇好，屬實盤掃上。而中芯ADR結合每股1.69港元，比對香港收市每股1.64元有溢價。
話時話，上周四，寶島半導體巨擘台積電董事長張忠謀，就行業未來一年前景，向外資大淡友解畫，雖然解到扯火，但台積電周五立時彈升1.9元台幣，見42.9元台幣，亦進一步印證淡友有留手或轉軚迹象。淡友轉軚，中芯ADR又勢如虹，香港呢邊隻「981」，係時候跟轉。
晶門科技（2878）上星期二公布半年度業績，純利勁升1.4倍至1.77億元，同中芯一樣，股價無反應。只講兩點，第一，呢家從事設計、開發及銷售專有IC解決方案企業，繼續受惠彩色顯示器IC龐大需求，下半年業績繼續睇好，所以，晶門獲名牌美林及里昂睇好，美林更實牙實齒，目標價睇2.5元，有名牌力撐，估計唔會載浮載沉好耐。第二，晶門開發產品，有少部份就係外判予中芯生產，若中芯股價有表現，市場追落後，都即時聯想到晶門。
錢雋