Twins歌影兩邊忙，雖多次被批評唱歌甩嘴又走音，成員鍾欣桐（阿嬌）表示因工作太忙而沒時間練習，有失誤亦是身不由己，但已盡力做好本份。她近日拍攝武打戲時，更令舊患復發，傷痕纍纍。
鍾欣桐近日拍攝電影《千機變II花都大戰》有連場武打場面，這回她大耍中國功夫，鏡頭前很有型，但鏡頭後卻周身骨痛，吊威吔更吊到肌肉勞損，舊患復發。
阿嬌說：「第一集《千機變》係拳腳同西洋武術混合，續集除咗套戲個名之外，所有嘢同上集唔同，呢次要打正宗嘅中國武術，大部份嘅動作都係我自己做。」
阿嬌續說：「今次係吃力㗎，我啲舊患發晒出嚟，有時會痛，手踭、膝頭都有舊患，啲舊患係我以前拍《愛情當入樽》個MV時吊威吔整親嘅，幾咁痛苦呀，吊完威吔第二日我成塊面腫晒，一日睇四次醫生，手有少少嘢，眼又有少少嘢，盆骨又少少嘢，之後重要做騷，一路都冇時間醫，今次咪發出嚟，我膊頭又肌肉勞損，要大修呀！」
Twins要拍戲又要唱歌，阿嬌和阿Sa（蔡卓妍）卻多次被狠批唱歌甩嘴走音及靠包裝，阿嬌對此並沒發怒，更十分認真地說：「新聞自由啫，我哋有做好自己，唱歌同拍戲係要練，之前亦要準備，有乜失誤我都唔想，有咁多嘢做，我都想有進步嘅空間，但有冇人畀空間我哋進步？好多嘢都要攝時間嚟做，我哋盡晒本份做㗎啦。」
另外，曾與成龍傳緋聞的阿嬌因為拍攝《千機變Ⅱ》而與成龍兒子房祖名（Jaycee）傳出緋聞，問她與一對父子先後傳緋聞，可有感到尷尬？她說：「我唔尷尬，佢哋尷尬啲。」
阿嬌在言談中似乎對祖名印象甚佳，她說：「Jaycee內外都好似大哥（成龍），我識大哥唔係好耐，但我見親佢都好叠馬，Jaycee亦都鍾意call齊朋友食飯，吓吓都嚟大鑊飯。佢好有家教，又好留意身邊嘅嘢，第一日同佢拍嘢時，佢唔出聲，我又冇主動出聲，後尾大家放食飯，我哋又冇紙巾，佢就偷偷地同個助手講，叫佢攞紙巾畀我哋。」
未知阿嬌會否覺得祖名有追求之意？她笑說：「唔係追，佢對個個都咁好，我同佢都係拍嘢先接觸，不過佢幾成熟，爹哋媽咪教佢好多嘢，佢成日講埋啲中國歷史，我都唔明嘅，講得好深奧，搞到我好似港燦咁。」
問阿嬌與祖名可有發展機會？她即說：「做朋友好啲，做朋友係義不容辭，無任歡迎，得閒搞下佢，佢又會笑，有乜佢都會盡力幫，好有義氣。」
阿嬌的緋聞男友多多，包括余文樂、陳冠希（Edison）、方力申及房祖名，阿嬌談到方力申時，掩着嘴巴大笑說：「真係好笑吖嘛，話我同方力申無喇喇去咗日本，佢喺日本嘅時候，我喺英國，真係𢱑爆頭！你講嗰幾個，冇乜點聯絡，見到面咪問候吓。」
阿嬌在娛圈見盡美男子，問她會否覺得靚仔沒本心？她說：「靚仔又未必冇本心，睇個人本身啫。拍拖唔好有壓力，同佢要喺心靈上溝通到，要好舒服，我唔需要特別為佢做啲乜嘢，但大家又開心，好難呀呵？有好多外來因素影響嘅，身邊人唔鍾意已經好難受。」
阿嬌揚言緋聞男友全非真實，那她會否希望真命天子出現？阿嬌說：「二十三歲就要真命天子，咪要諗結婚？我呢啲年紀係希望有人錫，但有又要好花時間，煩呢樣煩嗰樣，咪好忙囉？呢啲有就有，冇就冇。」
如果拍拖，阿嬌是否須要經母親及經理人霍汶希（Mani）「過目」？她說：「我拍拖媽咪冇所謂，公司畀拍拖㗎，如果我拍拖，會畀Mani同老闆（楊受成）知。」
Twins平日工作極忙，但忙歸忙，阿嬌還能擁有私人空間，所以她沒有因為工作忙而斷六親，她說：「我唔會冇晒私人空間，我成日唔瞓覺，要做自己嘢，好忙㗎，喺屋企執吓呢樣，搞吓嗰樣，開晒個壇出嚟，我同媽咪、表姐一齊住，唔會見唔到家人㗎。」
撰文：朱倬誼 攝影：仇志德 服裝：Zucca 場地提供：夜上海（馬可孛羅香港酒店）
