荷李活動作影星雲迪素（VinDiesel），佢主演嗰套新戲《天域戰士》於今個月七號就喺日本上映，佢前日就親身飛咗去日本宣傳。電影公司亦好識做，專登搵咗有份幫手為戲中女主角配音嘅日本性感女星仲根霞同埋日本富婆叶美香兩位靚女，喺活動上獻花畀雲迪素。不過面對住兩位靚女，雲迪素似乎表現得過份熱情，重嚇親霞女㖭。
雲迪素前日抵達日本，即刻馬不停蹄連走兩場宣傳佢套新戲。雲迪素首先去咗東京一間酒店出席記者招待會，而有份為戲中女主角配音嘅仲根霞就負責上台獻花。此時，雲迪素一見身穿吊帶裙嘅霞女，就忍唔住大叫：「ILoveHer!」重一手攬實霞女條纖腰強吻，嚇到霞女花容失色。事後，驚魂未定嘅霞女就面紅紅咁話：「雖然電影裏面嘅佢好cool好有型，估唔到原來佢真人係咁熱情嘅。」
雲迪素之後出席電影試映會，叶美香就着咗件性感日式浴衣出現，大騷佢嘅性感身材，雲迪素見狀亦非常識做咁大讚叶美香靚女。