每年立法會選舉，候選人都有唔少競選花招，今次喺港島區分兩條隊出戰嘅民主黨同45條關注組就決定星期一報名前，搵前主席李柱銘揸車，載住余若薇、楊森、何秀蘭三個拍檔遊街宣傳，不過馬丁講笑話，星期一兩點左右，大家冇乜事唔好開車去中環，事關佢手車其實麻麻！但最驚一定唔係馬丁，係何秀蘭，因為馬丁揸嗰架車其實係佢嘅，有個咁嘅司機，何姑娘有乜理由唔騰雞先得？
除咗有馬丁做司機之外，民主黨重搵埋黨鞭司徒華喺噚日嘅港島義工動員會上面向啲義工教路，傳授華叔一派幾十年助選單張嘅獨門心法。華叔話其實好多人初初派單張會好悶，但做耐咗就會有方法打發時間，重會愈派愈過癮。
好似派派吓單張，就可以乘機估吓迎面而來嘅人會唔會接你張單張，又或者估吓嗰個睇落似「維園阿伯」嘅人會唔會同你握手？以華叔幾十年經驗，若果佢收你張單張，就好大機會支持你，若果重走埋嚟同你握手，咁呢張票就一定係畀你！所以你就會慢慢發現，悶到死嘅派單張工作一樣樂趣無窮！可惜華叔話佢要喺九龍東睇住胡志偉，鞭長莫及，唔可以幫港島助選。
（圖）民主派周一報名出戰港島區前，先搵馬丁揸車遊街宣傳。
傳真︰2623-9278
電郵︰