巴塞隆拿會長拉樸達出任會長第二年，今屆大肆擴軍，希望喺聯賽再同皇馬爭一日之長短，更計劃喺日本同西班牙搞好球會形象，今季巴塞真係雄心萬丈！
完成南韓之行後，巴塞隆拿經已去咗日本友賽，但係佢哋對到東京唯一巴塞專賣店宣傳更重視，球會總經理擺明話要加強球會形象。其實，巴塞同日本重有一樣幾微妙關係，就係日本長壽足球漫畫《足球小將》主角大空翼（即戴志偉），喺故事中效力緊呢間球會，巴塞隆拿電視台就決定賣咗主角獨家肖像權，作為日後宣傳另一殺着。
其實，巴塞今季大改革，不斷買球員，重有信心簽埋伊圖番嚟，我求大俠真係睇好佢哋㗎！
啱啱喺友賽對格拉斯哥流浪時受傷嘅熱刺前鋒羅比堅尼，證實又要唞四至六個禮拜，開季唔使預佢。同時間，英國《衞報》又爆出熱刺教練辛天尼同總監晏尼臣，為咗球員買賣事宜對罵；雖然熱刺即刻喺官方網澄清無咁嘅事，但睇佢哋呢排黑氣纏身，季初賽事你重敢唔敢捧場？
我求大俠日前報道H卡馬拉破英格蘭借用費紀錄一百五十萬鎊加盟些路迪單料，終得到證實，而且些路迪重有權隨時以五百八十萬鎊（約八千二百多萬港元）轉會費，同狼隊買斷佢。唔怪得當日狼隊領隊鍾斯，見保頓嗰邊連出幾次二百多萬鎊價錢都唔放人啦，原來有後着！
紐卡素隊長舒利亞出名正直，日前佢話球隊今季聯賽冠軍無望；事實上強敵環伺，紐記想封王不容易，總好過亂開空頭支票。而曾批評佢嘅前領隊古列治，將帶領飛燕諾返去聖占士球場踢友賽；「老舒」就話到時若與對方場邊相遇，仍會主動「揸爬」言好，果然有氣量！
剛由墨西哥度完假嘅網隊主將傑特，一返到老家就收到壞消息，佢另一個戰友杰杜斯步馬田後塵，突被交易咗去快艇，激到傑特即搵啲高層解畫。其實睇網隊近排頻頻賣人，擺明開始重建球隊，傑特如果想喺退休前攞番個總冠軍，睇嚟都喺早走早着，否則過幾年想走都冇人要。