一年一度嘅「新城國語力頒獎禮2004」今晚喺灣仔會展舉行，嚟自台灣嘅緋聞情侶周杰倫同蔡依林唔單止雙雙出席，聽聞佢哋兩個重會分別成為男歌手同女歌手方面嘅大贏家，真係飲得杯落！
馮仁昭打聽到，周杰倫嘅總成績同劉德華打成平手，每人分別攞到四個大獎，其中周杰倫除咗入圍歌之外，重會攞埋「亞洲大碟」、「歌王」同「國語力亞洲歌手大獎」；至於華仔雖然只得一首歌《太想愛》入圍，但已經足夠幫華仔撐晒成個大局，因為佢除咗入圍歌之外，重攞到「年度歌曲大獎」、「歌王」同「國語力香港歌手大獎」。
至於女歌手嘅戰況亦好激烈，蔡依林就分別以入圍歌、「歌后」同「舞台大獎」三個獎，撼低其他女歌手好似梁詠琪同容祖兒等，成為成績最好嘅一個女歌手。馮仁昭相信，無論係佢哋嘅緋聞定成績，今晚頒獎禮上周杰倫同蔡依林都一定會成為傳媒焦點嘞！
鄭希怡（Yumiko）噚日連走兩場活動，對於同張國榮前助手Kenneth滑水傳新聞，又被指胸部似「缽仔糕」，Yumiko就話：「我本身都鍾意食缽仔糕，形容得好獨特，不過我似包多啲，小籠包？咁又細咗啲。」Yumiko又表示Kenneth只係佢嘅朋友同教練，又強調自己買衞生巾並唔係因為月事到。
韓星全智賢噚日去咗台灣做宣傳，佢同二十多名隨行工作人員抵達台灣機場，見到有影迷嚟接機，不過嗰個影迷竟自稱係韓星張赫嘅影迷，只係嚟練習接機，都好搞笑啫。全智賢一路都好cool，只係見到廣告商出現，才露出難得一見嘅笑臉，所以台灣傳媒覺得佢份人好現實同巿儈。
俞可欣日前因為發現子宮生咗個良性瘤，所以秘密入院做手術，前日下午出院，佢噚日覆診時接受訪問。佢用國語話：「以前我覺得犬隻都可當我的子女，但這次手術後，我怕疾病會復發，所以趁子宮還在，計劃兩年內懷孕生子，不排除會借精生子。」俞可欣承認以前曾錯過多段好姻緣。
盧巧音前晚去咗高山劇場度表演，有報道指佢同彭敬慈分手，盧巧音就話：「我哋都冇拍拖，又點分手？本來我冇諗過要回應，但呢啲報道係唔真確嘅。呢件事會中傷到佢，我唔想朋友受傷所以先講，我哋以後仍然係朋友。」
韓君婷一直都同阿媽一齊住，佢不斷想辦法令佢媽咪住得好啲，認真孝順。噚日港島東區有個新樓盤正式開售，佢趁得閒就去咗睇示範單位，佢話：「𠵱家同媽咪住喺大概有七百幾呎嘅唐樓，我想揀間千幾呎嘅樓嚟住。平時行街都會睇吓地產公司，𠵱家都儲咗一筆錢喇！」
