人稱「亞瑟王」嘅教統局局長李國章，噚日真係老貓燒鬚，竟然輸畀自己個下屬「飯焦」羅范椒芬。話說噚日飯焦一早去完五台山出席電台節目，主動走去喺鑽石山舉行嘅「中學生出路資訊SHOW」，有啲嚟搵升學資料嘅會考生，可能已忘記佢曾經講過「學生最冇資格批評特首」，主動走去搵佢輔導，紓解放榜在即嘅緊張心情。
李國章喺下晝先嚟，佢參觀攤位時得啲機構代表同佢傾偈，咁啲學生呢？八方只係聽到有人沙膽問朋友「呢個係邊個嚟」；又見有工作人員想拉學生同佢傾偈，但對方就耍手拒絕；重有啲學生見到佢即刻彈開，搞到亞瑟王好無癮。
講開亞瑟王，不能不提𠵱家上映緊、講述古英國傳奇國王亞瑟王嘅《王者無敵》（KingArthur），李國章唔肯答睇咗未。佢反問記者有無興趣一齊睇，局長，係咪包場請記者睇先？
（圖）羅范椒芬（左）主動「踩場」，啲學生見到佢都好主動搵佢問問題。 張家俊攝
傳真︰2623-9278
電郵︰