東亞銀行（023）公布業績，雖然盈利有增長，但卻低於預期，即時令市場遍地都係眼鏡碎，股價下跌不特止，重有人將大市升幅收窄歸究於東亞。
零售股就愈炒愈勁，經紀黃提及的YGM貿易（375）繼續強勢，最高湧過上去9.55元，收9.20元，勁升15%，成交股數509萬股，金額4526萬元。同系的長江製衣（294），亦受惠勁升15.7%，收2.40元，成交有1131萬股，金額2563萬元。
YGM最近頻頻見分析員，據講將有證券行出報告品題，但經紀黃提醒小初，隻股短時間內升得太多，未免有啲過火，況且佢問過好幾個芬佬睇法，暫時唔見太受落。
YGM在中港台均有經營成衣零售生意，未來更諗住在大陸繼續開舖，目前公司主要催谷最近用1700萬美元買嘅品牌GuyLaroche。
不過，呢類有一定歷史的牌子，若要重新包裝推廣，肯定要花唔少心思同金錢，但成效如何則係未知之數，存在一定風險。
慕容小初