封咪，即係曠工，即係對惡勢力低頭，即係在急流中退縮，唔肯搏殺。這種打工仔，老闆點會鍾意，叫你返歸食無情雞，是每個老細都會做的商業決定（更堅持自己只想搞活經濟，唔識政治）。
有人棄兵曳甲，有人敢死落場。這樣吧，為了還俞琤「一個公道」（近排時興這種「冇借有還」的活動），我建議商台改聘下列人士開咪，以正視聽：雖然解僱了名嘴，但對言論自由的堅持，並無解體，請聽眾放心。
一、長毛。長毛肯定不會做逃兵，聽講他家居樸素，有又一餐無又一餐，生活奉行minimal主義，因此並無唐家璇影射的「欠了一屁股債才走佬」的可能，請長毛開咪，俞琤可以慳番大把口水解釋立場，有更多時間去瘦身。
二、肥佬黎。唔使多講，肥佬黎點會退縮，就算十個陳壽山日日給他打電話，讚他老婆生得四正、個女靚過香港小姐，肥佬黎只會開心到笑唔埋口，絕對不會放棄言論自由的平台。（噢，也許他會衝口而出，一開咪就挑一聲，乜平台唔平台呀，多×餘！）
三、新華社。本身已經夠晒惡，勢力無遠弗屆，俞琤搵着佢哋開咪，一定不會托手踭劈炮，好使好用過救生員。
四、俞琤自己搵自己。自己查自己，是董班子開創了的先河，既然冇註冊，俞琤食得無謂嘥一於照抄，自己坐正自封名嘴，日日面對歷史而無愧，誓神劈願，唔怕人斬，無懼重傷，永不落台。