舊愛禮物新歡享
馮仁昭四圍超：李亞鵬揸周迅Audi載王菲

王菲近期同內地小生李亞鵬打得火熱，好似早幾日咁，佢唔單止俾記者影到喺李亞鵬北京屋企出入，李亞鵬重揸車送王菲返去北京嘉林花園香閨，當佢哋兩個見到記者影相時，重好大方咁任影唔嬲。

冇要求物歸原主
唔講唔知，當日李亞鵬接載王菲嗰部Audi房車，原來係李亞鵬嘅舊愛周迅所送。馮仁昭聽聞內地當紅花旦周迅近年攞過百花獎同金雞獎嘅「最佳女演員」，並獲贊助商送咗兩部名車，分別係一部寶馬同一部Audi；由於當時周迅同李亞鵬蜜運緊，周迅就將部Audi送畀愛郎，就算兩個人分咗手都冇同對方攞番部車，認真大方。
不過，如果周迅知道李亞鵬用自己送嗰部靚車嚟接載新歡嘅話，唔知會唔會即刻向李亞鵬收番部Audi呢？又或者，如果王菲知道男友用舊愛部車嚟車自己，會唔會寧願買過另一部新車送畀男友呢？

祥嫂身體欠佳人豁達
祥嫂洪金梅前晚出席慈善活動，睇嚟精神都唔錯，但佢就向記者表示佢依然好多病痛。祥嫂話：「我血壓高，心臟有事，重有抑鬱症，見到記者都有啲驚。」跟住問及鄧兆尊欲重開楚留香一事，祥嫂就拒絕回應，之後佢話：「其實我𠵱家已經睇開咗，豁達咗，雖然遲咗啲。」

苗僑偉義助獨立電影
苗僑偉前晚亮相有份參演嘅電影《當碧咸遇上奧雲》首映，佢話第一次拍獨立電影，重係半義務性質，連酬勞都冇乜點計。原來呢套片曾志偉都有份投資，阿苗話：「志偉好有心去培育新浪潮導演，本來佢都有份演，不過佢大肚腩唔似體育老師，惟有叫我做囉！」

2R拍廣告笑不停
女子組合2R近日拍咗韓國SaFa嘅MP3廣告，佢哋以青春性感打扮示人，由於廣告嘅構思係要2R對住塊鏡擺甫士，佢哋兩個一對住鏡頭時即忍唔住笑，而為咗配合廣告主題，2R又要擺出S形甫士，搞到佢哋係咁叫攰。馮仁昭覺得佢哋應該向S形甫士始祖鄺美雲偷師。

森美了解商台立場
商台DJ森美噚日喺北角出席新片《甜絲絲》開鏡禮，對於商台同名嘴鄭經翰（大班）提前解約，佢話：「香港每個巿民都好支持大班，作為商台一分子，我好明白公司立場，俞琤係我最尊重嘅前輩，呢樣嘢唔係佢嘅決定，係管理階層嘅決定，公司冇任何指示話唔可以講啲乜嘢。我個節目好少涉及政治嘅嘢，所以𠵱家仍享受到好大嘅言論自由。」

齊秦沉醉忘年戀
現年四十歲嘅齊秦，最近喺深圳識咗位年僅十八歲嘅女朋友，為咗個女仔，佢重特登喺深圳買咗兩間屋㖭！
齊秦同內地傳媒提到呢段新戀情時就話：「就好似緣份正在催促我，我見了她之後，內心有一股力量在告訴我，我紅鸞星動了。」雖然有人笑佢好似做咗人老竇，但齊秦一都唔介意。