莫文蔚近年成為不同品牌代言人，前晚她為慈善基金會任形象大使，宣揚世界和平。她更向私人收藏家商借一件超過半世紀歷史的古董裙亮相，集中西文化特質、又甚具愛心的她，擔任和平大使適合不過。
莫文蔚（Karen）前晚以「世界和平女神形像大使」身份，在尖沙嘴出席晚會，慶祝「世界和平女神」雕像坐落法國諾曼第，紀念二次大戰盟軍登陸六十年，其他出席晚會嘉賓包括曾志偉、任達華、張敏、楊思琦、袁潔瑩和蘇志威劉小慧夫婦等。
莫文蔚穿上一件泛黃的喱士釘珠裙，她透露服裝來自私人收藏家，她說：「件衫係一九五○年嘅服裝，超過五十年歷史，係一位私人收藏家特別借畀我，冇收錢㗎！好彩非常啱身，好fit。我以前都有去過英國啲跳蚤市場尋寶，𠵱家我就主要收集媽咪啲舊衫。」
莫文蔚在和平女神仿製品前擺出同樣甫士拍照，她說：「今次係宣揚世界和平，好有意義，我都好希望遲啲去諾曼第睇吓真雕像。」至於為何被選中任形象大使，她說：「今次都好榮幸，唔知點解搵我，可能係同我背景有關啩。我係中國人，喺歐洲讀書，學校又係聯合國資助，又可能以前跟過unicef（聯合國兒童基金會）去內地探訪山區、做過慈善活動有關。」
此外，袁潔瑩以透視裝示人，她透露十一月將會到內地橫店拍劇，她說：「真係好擔心，之前都去過呢個地方，冬天真係凍死人，我𠵱家準備增肥，增五磅脂肪去抵冷。」
採訪：HoWingNing
攝影：ChanChiLam
