由噚日起至禮拜日，喺港島東、中環、尖沙嘴至紅磡一帶上空，會見到一架直升機，吊住幅宣傳橫額飛嚟飛去，橫額寫住「嘉亨灣」三大隻字。發展商恒基地產營業部總經理張炳強話係全港首創。
蘭西計過數，呢個西灣河新盤，已經連續兩周密集推介，真係名副其實鋪天蓋地。
張炳強話，做直升機宣傳，淨係幅二千呎特製橫額，已經要成三十幾萬，未計三日每日租三粒鐘直升機費用。
售樓處噚日啟用，又安排大型舞獅，出動埋開篷跑車，貼晒嘉亨灣字樣巡遊，排場十足。
另外，為咗迎合唔同國籍人士，特別印製十二種語言嘅簡單樓書，每種三千本，包括中、英、德、意、法、日、韓等等。
發展商唔少友好噚日睇樓，好似嘉華呂耀華、新地陳秀賢，重有人見到東亞李國寶公子李民橋，由發展商陪同睇樓。
管理政府大批物業嘅產業署，時不時都將啲以前高官住過、又屬歷史建築物或古迹嘅貴重物業招租，啱啱又向城規會攞到批准，大潭水塘道盡頭、歐陸風格、評定為一級歷史建築物嘅宿舍，可以招標出租。
唔講語知，呢座樓屬於我哋伯爺年代，喺大潭篤抽水站附近，原為水務署高級員工宿舍，唔用之後，變成戒毒所，直到舊年，先至交番畀產業署。
由於對住成個大潭港，望山望水，景色一絕，產業署諗住將佢出租賺番啲。宿舍佔地萬四呎，除兩層高主樓外，重有一幢附樓，樓面逾四千呎，閒閒哋每月可以收番十幾萬租。
按揭證券公司剛辦九成半按揭保險，唔少二手樓買家甚感興趣。
美記郭玉滿話，將軍澳清水灣半島某租客，有意轉租為買，向恒生查詢，得悉要攞九成半按揭都冇問題，所以扑槌，用二百零七萬買入第七座中層C，近七百呎，呎價近三千。
恒生其後預先批核九成半按揭畀佢，可以分三十年還款，月供七千六，同佢之前租樓，每月七千五差唔得幾多。
美記澳門分行上月底開業，員工主要係香港人，為長遠計，最近兩個禮拜，再聘請三個當地人做代理。
澳門部董事張一輝話，三個都係大學生，二十至二十五歲，冇代理工作經驗，但佢認為咁重好，唔怕學壞師喎。為咗令新人加快融入工作，每日有專人給予培訓。美記目標係請五個當地代理。
請當地人，好處係熟悉環境，有優勢。
蘭西
電郵地址：