姬莉絲跟父母去蘇州旅行，媽媽說：「乜咁大變化嘅，以前冇咁多高樓大廈嘅噃，十五年前我同你爸爸嚟，蘇州好幽雅㗎！」去到杭州，媽媽又話：「唉吔，乜西湖邊咁多高樓㗎，破壞晒風景，以前湖邊漫步，好浪漫㗎。」姬莉絲二十歲出頭，都唔知阿媽以前見過乜嘢靚風景，佢自己日常在中環出入，覺得蘇州、杭州啲大樓無甚足觀，冇乜突出之處，但係見到阿媽猛咁呻，惟有洗耳恭聽。
後來姬莉絲自己去西安旅行，當然係睇古蹟啦，兵馬俑係遊客必到之地。西安本地導遊講到眉飛色舞，後來對啲團員講：「第二度就活人養活人，阿仔養阿爸，我哋西安就係死人養活人，祖宗養子孫。」姬莉絲一時聽唔明，叫導遊解釋清楚，導遊話：「好簡單啫，兵馬俑係秦始皇時代嘅遺蹟，𠵱家為西安帶來咁多遊客，養活成個西安旅遊界、酒店，包括我在內，重唔係死人養活人。」
姬莉絲卒之明白晒，心諗死人養活人呢個現實，普天下皆然，威尼斯啦、金字塔啦、羅馬、倫敦等等旅遊勝地美景，都係古人留落嚟嘅，益晒啲子子孫孫。蘇州、杭州都係祖宗遺物，吸引大量遊客，但係啲中國子孫就心急發達，不惜填運河、剷古屋，只為興建公路與玻璃幕牆大廈，美其名曰溫飽權，點唔令人心痛。
肥仔K聽到姬莉絲有感而發，亦有意見，佢話：「算啦，中國太古老嘞，譬如宋朝古廟，到明朝破破爛爛，於是拆咗再起；明代嘅古廟，今日視之為文物，拆咗明廟起公寓，三百年後又係古蹟啫。」此乃太過長遠嘅睇法，姬莉絲一時間接受唔到。