◆儘管純利增長遜預期，但李國寶（圖右）昨日心情靚極，上台公布前又四圍問人點睇東亞成績表，點知坐在首排的都是該行職員，個個當然唔知點回應老闆，後來寶哥哥亦發現呢個尷尬，於是轉往後排問記者，記者反問他是否滿意業績，佢老人家話梗係希望做得重好啲。
◆巴塞爾資本新協定在06年施行，李國寶被問及有關準備時，順水推舟，引述金管局助理總裁唐培新致電給他，讚東亞喺Basle預備工作上，全港數一數二，重話要昭告天下，要同行學吓。寶哥哥笑騎騎咁話：「我唔想blowmytrumpet（自吹自擂）……你哋問到我先講咋！」
◆李國寶說，由於要招攬人才壯大業務，故上半年支出增加，例證一就是7月1日成立了財富管理處。記者打聽之下，原來該新部門的主管，果真有錢都未必請得郁，蓋這位新任總經理，乃寶哥哥二公子李民斌。洋名Brian的李民斌，與父、兄（李民橋）同為劍橋高材生，本身專攻會計，學成後回港發展，佢亦係消委會委員之一。現時Brian返東亞幫手，父子一門三傑，難怪寶哥哥笑逐顏開。