車路士繼續顯示佢哋銳利攻擊力，日前喺世冠球會爭霸戰三球淨勝羅馬，但係入球功臣之一嘅基斯文領紅牌，應該要喺英超停賽，都算鹵莽。
連同上場對些路迪入咗兩球，基斯文兩場友賽入三球，對佢喺競爭激烈嘅「車仔」前鋒正選位置爭奪戰有好幫助；偏偏呢位塞黑射手日前友賽同羅馬中場達葛治講手領紅，可能停賽三場，錯過對曼聯大戰，我求大俠覺得，對佢同球迷都係損失。
反而，對「車仔」可能影響唔大，陣中攻擊球員多，杜奧巴處子登場又可以射破羅馬大門，如果基斯文咁樣無咗正選位，只有怪自己鹵莽。
皇馬季前首場熱身賽有好開始，贏古河市原三比一，對隊長魯爾嚟講，呢場比賽亦好重要，有一球進帳，總算喺新球季開齋，佢重當選最有價值球員，除咗成七萬港元獎金外，重獲贊助商贈送朱古力一年㖭！我求大俠諗，魯爾上季咁沉，食咁多朱古力隨時變肥仔就弊。
潮流興搵名宿教波，好似奇連士文同尹巴士頓分別做咗德國同荷蘭教練；同佢哋同代嘅意大利鋼門辛格，日前做咗羅馬尼亞球隊布加勒斯特星隊嘅教練。辛格教波都好意外，之前教過布加勒斯特國民，對羅國足球有一定認識。咁睇辛格條路應該比奇連士文和尹巴士頓易行。
雲達不來梅今屆雖然有艾列頓走咗，但前線重有華迪斯同當紅炸子雞查列斯迪斯，以及簽咗高路斯，故有指卡斯歷隨時冇正選打。𠵱家卡斯歷前晚幫球隊喺德國聯賽盃四強，贏史特加二比○入決賽同拜仁爭冠軍；佢狀態咁弗，不來梅教練舒哈夫點會唔畀正選佢呀！
唔知意甲升班馬卡里亞利個主席施連奴，係咪聽到我求大俠之前話佢無情無義，今季唔再同上年協助球隊升班嘅蘇拿續約，原因係覺得蘇拿獅子開大口。日前施連奴終於轉軚，願意畀多一年合約蘇拿，據報兩人係喺一場高爾夫球賽，一邊打波一邊洽談，唔知係咪施連奴輸咗呢？