由美國漫畫改編電影嘅熱潮一直冇停過，好多人覺得《蜘蛛俠2》好精采，而另一部由新一代經典作品《Hellboy》改編嘅科幻電影《地獄之子》亦都喺下個月就殺到香港。
國際知名嘅美國漫畫家米克米路拉（MikeMignola），十年前以《Hellboy》成名，畫筆下創造咗一隻善良嘅怪物Hellboy「地獄之子」，大受歐美同日本等地嘅漫畫迷歡迎。而拍過《幽靈刺客2之變種復活》嘅導演吉拿域戴拖路（GuillermodelToro），本身係百分百《Hellboy》迷，佢為咗自薦執導漫畫真人版電影，甘願放棄執導《哈利波特阿茲卡班的逃犯》，好彩拖路冇令漫畫迷失望，《地》喺美國上映以嚟都獲讚拍出原著嘅神髓。
地獄之子係美國近年好特別同出位嘅漫畫英雄，喺一九四四年十月九號出世嘅佢來自地獄但冇破壞性，行為接近人類，最搞鬼係地獄之子愛看卡通片，愛食朱古力零食又愛貓，重反叛得來孝順，職責係捕捉妖魔。地獄之子亦暗戀一位擁有超能力嘅女拍檔，學人寫情書，最後同愛人錫到出火。由於影片反應唔錯，拖路已答允拍攝○六年上映嘅第二集。