才子變特工破開畫紀錄
麥迪文柏林跳橋收四億

一向被視為荷李活斯文才子嘅麥迪文（MattDamon），自從主演《叛諜追擊》系列後，形象即刻唔同晒，佢扮演嘅型仔特工為佢嘅事業殺出一條血路，今次《叛諜追擊2：機密圈套》開畫周末票房高達五千二百萬美元（約四億五百萬港元），刷新咗阿麥嘅最高開畫票房紀錄。

打消引退念頭
據知阿麥未接拍兩集《叛》片之前，因為連續幾部片都唔收得，曾經諗過引退，不過佢憑住呢兩部片而再創高峯，相信阿麥已經打消咗呢個念頭。而今集阿麥扮演嘅積遜雖然同法蘭嘉波坦黛（FrankaPotente）飾演嘅情人瑪莉喺希臘安定咗落嚟，不過仍然有好多敵人對佢虎視眈眈，之後瑪莉失蹤，積遜被迫重出江湖，再同一股神秘勢力周旋。

歐亞多國取景
其實《叛2》今次大收不無道理，成部戲走勻歐亞，喺柏林、俄羅斯、印度、巴黎、意大利同蘇黎世等地取景，可謂不惜工本。而阿麥亦親身上陣演出高難度動作，包括由柏林一條大橋跳落嚟，又接受洛杉磯特種武器戰略小組SWAT嘅特殊槍械訓練，以及接受飛車訓練，盡顯佢嘅專業精神。
另外，盛傳接拍《無間道》荷李活版《TheDeparted》嘅麥迪文，重有機會喺○六年上映嘅新片入面扮演啱啱創咗六奪環法單車賽紀錄嘅岩士唐（LanceArmstrong）㖭。