個市有少少嚇親人，上晝收市前15分鐘，恒指低見12084（跌235點），埋單12183（跌137點）。低位回升近百點，冇咁傷。
昨日所提嘅3隻恒指Call輪，喺跌市中自然隻隻跌。個市大反覆，低位時買Call輪，見高位則畀番佢，應該搵到一盅兩件。𠵱家要博大市反彈，揀9773最實際，因為溢價較低，9月尾夠鐘，輪價8.8仙，溢價2.5%，槓桿率25.2倍。呢件成交好勁，金額都有44球，睇錯方向要投降，個個位有得成，要投降，兩三秒鐘即可離場。
大隻地產股中，新地（016）最硬淨，低見65.75元，拗番上66.50元，只係微軟1格。個市反覆，新地耐唔中跌落去，都有機會彈番上去，喺一兩蚊變化中撲捉機會，見低位撈Call輪，有機會執三茶兩飯，Call輪對象有9391同9977。
9391喺12月中到期，輪價58仙，溢價4.8%，槓桿率11.5倍。9977喺10月尾到期，輪價34.5仙，溢價7.8%，槓桿率19.3倍。兩隻比較，9391實際啲。炒輪，有時咪淨係睇槓桿率，個市唔係太明朗嗰陣，揸低溢價輪輸起上嚟冇咁傷。
中銀（2388）好穩定，收13.10元，跌10仙。中銀前日成4.6球，昨日上到10.1球，增逾1倍，好似睇得吓，吼低位買Call輪，主角係9211，年底到期，輪價19.7仙，溢價2.8%，槓桿率6.7倍。其次9169，明年2月到期，輪價14仙，溢價5.2%，槓桿率9.4倍。
章盛