劉德華前晚與章子怡及金城武等，在日本新宿出席《十面埋伏》首映禮，華仔獲大班影迷熱烈支持，更險些被拉跌。而章子怡亦不讓華仔專美，穿上性感吊帶裙，十分搶眼。 特約記者森林檎日本直擊
劉德華、章子怡及金城武等前晚在日本新宿出席《十面埋伏》首映禮，導演張藝謀及武術指導程小東亦有現身，全場三千座位爆滿，大部份觀眾都是華仔的影迷，他們更做了一個大橫額以示支持。華仔沿途不斷和影迷握手及簽名，更有fans上前摸華仔及與他擁抱，混亂中華仔幾乎被拉跌，身旁的保安即時上前扶着他。
華仔上台接受當地傳媒訪問，提到其性格與戲中的捕快有何相同之處，他透過繙譯說：「如果現實生活中殺人唔使坐監，又有人搶咗我心愛嘅女人，我都會同劉捕快一樣殺咗個情敵。」
女主角章子怡前晚亦穿上性感吊帶裙搶鏡，不過席間司儀要求她示範一字馬及踢腿功夫，她以功夫全是程小東指導為理由推搪，還表示應該由程小東示範，弄得程小東頗為尷尬，他說：「我係幕後人，唔會搶主角風頭。」
華仔表示十分欣賞該片在日本改名為《Lovers》，他說：「呢部戲係以愛情為主題，亦冇隱藏人性嘅醜惡面，唔係外界以為嘅武俠片。好多日本傳媒睇完後，都話呢部係好深情嘅愛情電影，佢哋有啲重睇過兩次以上。」
昨日有報道指華仔早年買下手塚治虫名作《怪醫秦博士》的版權，因合約過期，現有電影公司買下版權，並邀請金城武演怪醫，華仔昨日說：「天幕喺○○年向手塚個女買咗版權，本來諗住搵伊健拍，後來公司發生咗啲事拍唔成。」提到會否介意由金城武演怪醫，華仔說：「唔會，呢個係好故事，金城武又係好演員，我諗拍出嚟都會好好睇。」
