期指結算日，好友不設防。杜指近日雖表現強勢，但昨日現貨市場甫開，期指即上演笨豬跳，急插近200點，之後淡友每15分鐘質低藍籌股一次，直至午市期指結算大定為止，恒指由早市最多跌逾兩百點，收窄至137點，收12183。
近年馬會投注額大跌，除經濟因素外，馬太難賭是最主要因素，結果令不少馬迷卻步。昨日睇完港股期指結算後，有唔少股友都擰晒頭，話要暫時離場，等大市成交多番至入市。老實講，趙飛雲雖然冇乜點損手，但亦有些少意興闌珊，正所謂「假唔緊要，最緊要似」，否則好難令人氣順。
恒指經昨日下跌137點後，技術形態當然有影響，但暫時未算太淡，恒指昨跌至50日線（現處12083）獲支持反彈，但受制於20日線（現處12204）。由周線圖看，恒指今日若能守在20周線（現處12203）之上收市，則後市仍可看高一線。另方面，若低於10周線12159收市，則不排除會回試11900-11800水平。
倉內股票暫未太受昨日跌市影響，吉化（368）有業績支持，尾段反彈回1.44元收市，倒升3仙。吉化10日線急升至1.40元水平，亦是250日線所在，支持力相當強，稍回可伺機加注。
新地（016）在藍籌股中表現算硬淨，僅跌1個位收66.50元。今個星期能守在66.75元之上收市，下周可望見68元樓上。
滙控（005）昨日低見114元，稍穿保歷加通道底，收115元，僅跌1個位，日線圖出現「釘頭」，又不算太差。下周一公布中期業績，照計今日走勢會有些少啟示。
趙飛雲