任賢齊早前為內地運動便服品牌到蒙古拍攝電視廣告，小齊與一班內蒙小朋友在大草原上踢波，小朋友精力旺盛，連小齊也頂不住，大歎自己老了不少。
任賢齊早前專程到內蒙的呼倫貝爾大草原，為內地運動便服品牌飛亞世拍攝電視廣告，廣告中小齊一展球技，與一班內蒙小朋友在大草原上來一場足球比賽。
內蒙小朋友非常活躍，一見到足球便踢個不停，導演原意是要求一班小朋友將球踢向小齊，然後由小齊帶球，豈料那班小朋友只顧自己比賽，沒有將球交給小齊，小齊惟有在小孩堆中不停搶波，但最後都是失敗，只見他不停追住小朋友，完全踢不到球，場面惹笑。
小齊也忍不住笑說：「真係老啦！唔夠佢哋嚟，我又唔可以大腳踢佢哋，怕踢到佢哋。」小齊表示其實自己最怕與小朋友或動物合作，他說：「我都係第一次同啲小朋友拍廣告，佢哋真係幾難控制，見到個波好似癲咗咁，原來佢哋係足球隊，唔怪得咁鍾意踢波啦。」
小齊是adidas內地的代理商，問他與其他運動品牌合作怕不怕牴觸？小齊說：「我都有問過adidas，佢哋有咁多地區代言人幾時輪到我，所以係冇問題，而且呢個牌子好有誠意，啲衫又唔老套，我遲啲重會幫佢哋設計啲衫，畀好大空間我，咁酬勞就梗係好啦。」
今次拍攝地點更是由小齊自己親自挑選，他說：「一直都好想去蒙古玩，但大草原啲天氣唔係好穩定，第一日拍攝完，以為自己係兵馬俑，成身都係泥土同塵。」
記者胡比內蒙直擊
