一百五十萬鎊都可以破轉會費紀錄？冇錯，些路迪用呢個價錢想搵狼隊塞內加爾前鋒H卡馬拉過檔，但係形式只係借用，破英倫最高借用費紀錄。
喺現今球壇，球會手上有一百五十萬鎊，要買一個實用前鋒絕對唔難，所以些路迪今次用呢筆錢，只係借用H卡馬拉，破科素上季由車路士借去伯明翰時舊紀錄，呢次舉動我求大俠真係唔多明解。雖則H卡馬拉上季尾幫狼隊入唔少波，但咁貴借用（未計年薪），值唔值有商榷餘地。
況且，些路迪參加美國世冠球會爭霸戰，打咗三場入四球嗰位後生仔比亞堤，加埋瑟頓同赫臣，就算要打歐冠盃，前鋒人腳唔多夠，用一百五十萬鎊買攻擊球員應該唔難，難明！
稻本潤一因斷腳正處休養期，冇得踢亞洲盃之外，原本同富咸簽長約機會亦一直拖住。據我求大俠所知，稻本將會提前結束英超生涯，重返母會大阪飛腳，主要原因係富咸要求減轉會費不成有關。其實，以稻本喺歐洲球壇評價不俗，季中絕對有機會重返歐洲，暫時返母會都正確。
AC米蘭公布新季球員球衣冧吧，新加盟嘅阿根廷射手基斯普將會穿11號波衫作賽。由於呢個冧吧以前由祖斯馬利同埋李華度呢兩個失意球員所用，所以被認定係個不祥號碼。據講基斯普唔信邪，照用可也，似乎好有信心同舒夫真高（7號）組成個「7—11」攻擊組合噃。
朗尼同未婚妻高蓮情變，好睇過公仔箱連續劇。雖然前日英國傳媒報道之前高蓮怒掟戒指係流料，但據呢對情人嘅友人講，佢兩個繼續冷戰、又分房瞓；又話由頭到尾係朗尼苦苦哀求唔好分手，只有繼續響埋一齊至令佢挽回形象，將來可以踢名牌球會喎。故事待續……。
今季英超球會熱刺雖然喺人事上大革新，但霉運始終未除；進行緊嘅連場季前熱身賽成績不濟，啱啱作客又輸畀蘇超格拉斯哥流浪，傷埋件主將羅比堅尼。同時間佢哋喺新季聯賽首戰對手利物浦，亦傳出主力基維爾及史米沙受傷消息，呢場揭幕戰兩軍好似鬥行衰運咁喎！