曾經向黎明公開示愛嘅台灣富婆許純美，前晚因為發噩夢諗唔開，佢自稱喺屋企吞咗約五百幾粒唔同種類嘅藥物自殺，後來送醫急救，好彩已冇大礙。
話說許純美嘅經理人噚日凌晨四點喺屋企接到佢電話，當時許純美一邊喊一邊交代身後事，佢經理人覺得情況唔多妥，就立即打電話報警，警方去到佢屋企，就即刻將許純美送去陽明醫院急救，好彩佢唔死得。
許純美喺醫院度表示前晚夢見已故嘅前夫鄭奇松唔理佢，一時悲從中來，於是一口氣吞咗百多粒安眠藥、百多粒鎮定劑和二百多粒心臟藥自殺。佢話：「以前自殺只吃了二百多顆，這次我想一下子吃五百顆，應該就OK了，OK就是死掉的意思。」許純美呢次係今年內第六次自殺，其中已有三次見咗報，佢話因為怕血，所以選擇服藥自殺。
許純美接受訪問嗰陣又好關心自己個樣，佢問記者：「我沒有化妝，會不會很醜？」而她邊說邊擺出唔同表情，佢話：「這是痛苦的表情，這是憂鬱的神色，拍一張閉着眼的，再拍一張側面的，再加一張神情落寞的。」許純美喺醫院接受訪問嗰陣，表情多多，馮仁昭一啲都睇唔出佢喺幾個鐘頭前曾經自殺過。
日本男星窪塚洋介，六月初喺橫濱屋企離奇墮樓，日本警方調查咗成兩個月後終於喺噚日發表咗窪塚嘅最新口供。據講窪塚承認墮樓前，老婆同囝囝都喺屋企，但係佢話事發嗰陣乜都唔記得晒，分明玩失憶，令人懷疑佢隱瞞真相。另外，窪塚經過兩個月休養，有朋友話佢面上嘅嚴重疤痕好番晒。
林珊珊前晚去咗跑馬地養和醫院探望弟婦彭羚，佢證實彭羚生咗個女，林海峰前晚重通宵留喺醫院陪太太，而佢哋嘅大女林泳，噚日就由一名中年女人帶住佢去醫院探媽咪同妹妹，之後重坐佢爹哋林海峰嘅七人車離開，林泳榮升家姐，以後有妹妹陪佢玩，一定好開心。
有線娛樂新聞台主播余思敏日前到日本拍攝旅遊節目《迷失東京》，今次係佢第一次去日本，不過當地幾乎日日落雨，所以佢不時要拿着雨傘遮住攝影機。余思敏話：「今次我哋冇去東京巿，去咗日光風景區，到達薰衣草田嗰陣，因為啱啱落完雨，我行到一腳泥，又仆咗落地，真係好慘。」
林熙蕾最近幫時尚雜誌《MAXIM》拍封面照，打扮得十分性感。林熙蕾喺訪問中話自己嘅外表有時會畀人好惡嘅感覺，雖然係咁，但佢一啲都唔介意，因為佢話自己嘅眼神好溫柔，不過林熙蕾就話對於嗰啲蝦佢嘅人就絕對冇情講，一定據理力爭，唔會蝕底。
