昨日係期指結算日，大市波動自然難免，儘管恒指最終下跌137點，但經紀黃話好多芬佬仍然睇好後市，小初聽完個心都定啲，希望下個月大市好番啲，唔再好似𠵱家咁淡靜。
近排大市悶還悶，實際上有唔少零售股輪流接力炒上，好似賣中價女裝上班服嘅慕詩國際（130），噚日發威再升14.8%，收1.78元，成交股數1456萬股，金額2478萬元。經紀黃話，據講隻股早排公布業績盈利上升後，獲得機構投資者留意。
因類似概念而股價勁升，重有YGM貿易（375），噚日再升9.6%，收8元，成交股數361萬股，金額2799萬元。YGM在短時間內，由唔夠5元升至8元，認真搶眼。經紀黃話聽到小道消息，可能有人想配股，但唔知係配新股集資，抑或減持舊股套現。
講到零售股，小初覺得可以考慮跟外資基金買永旺（984），皆因永旺近年搞百貨業相當掂，不斷獲得外資基金增持。
永旺噚日又升4.7%，收6.60元，創52周新高，但成交股數只有25萬股，金額161萬元。
慕容小初