葉璇下周會隨無綫拍攝大隊到雅典採訪奧運會，屆時她會變作記者負責採訪工作，近日葉璇已刨定歷屆奧運資料，又開始操弗自己，以便跟外國的記者搶位。
葉璇今年獲無綫安排到雅典採訪四年一度的體壇盛事奧運會，她下周三將出發，近日已開始細閱過往的奧運資料，以便採訪時更得心應手。
葉璇說：「公司畀咗一盒錄影帶我，𠵱家我每晚都拎出嚟睇。之前又同楊婉儀同韓毓霞傾過偈，主要向佢哋請教有關採訪奧運嘅經驗。」
問到葉璇可有甚麼事項最擔心？她說：「我怕唔夠外國記者高大，搶位會俾人批踭，比較輸蝕，所以我呢排要多啲做gym，練大隻一啲。」
葉璇還表示會爭取機會收集各國奧運的紀念章，問她可是留作將來做嫁妝，她笑言：「我會將呢批紀念章好好收藏，然後一代一代傳落去，始終好有紀念價值。」
此外，葉璇此次雅典之旅會逗留一個月，因為檔期相撞，她又無緣出任「歌神」許冠傑（Sam）的個唱嘉賓，葉璇覺得十分可惜，她說：「我已經錯過咗兩次，我知道阿Sam十月會再開演唱會，希望到時佢會再邀請我演出，遇到我又得閒就好，我好珍惜呢個機會。」
採訪：比華利
攝影：林德雄
服裝：Kookai
化妝：DorisMak
髮型：Jay（Hair）
