商舖交投旺，趁勢放售個案增加，市場人士話，協和集團正在暗標出售荃灣海天豪苑樓下商場協和廣場，樓面十六萬呎，市值五億。
英皇集團較早時亦都標售鄰近英皇娛樂廣場，叫價七億，聞說有基金同資深投資者傾緊，最高價六億以上，睇嚟投資者幾睇好荃灣舖市。
蘭西向協和集團打聽，負責人否認招標，只承認暫停租務，正在研究新招租方案。不過，坊間已有人收到入標邀請。
有人認為，該盤標售亦有一定難度，因為部份地舖業權分散，發展商當初發展物業時，同地盤小業主協議，將部份住宅及舖位作為賠償，海天豪苑落成後，最值錢部份街舖就即時被瓜分，發展商不能享有商場完整業權。
早一兩年，樓市氣氛較差，蘭西記得，發展商諗咗「一口價」賣樓招數，推出一批單位，以劃一優惠價發售。時至今日，賣樓又再重施故技，華懋馬鞍山迎濤灣，即日推出八個十二樓以下海景單位，劃一價三百三十八萬八，每呎由三千一百幾至三千五百幾，聽講話，比起六月份已經減咗價，優惠期到八月一號。
另外重搭埋其他優惠，包括面對換樓客嘅九十天成交期，而呢八個單位嘅買家，美聯每位都送價值一萬八千八嘅家具禮券。
旺角及太子一帶，都係自由行客常去之地，區內舖位買賣活躍，美聯物業商舖部董事盧展豪透露，由新世界等發展嘅太子道西別樹華軒，最後四個地舖，剛由投資者一手掃咗，涉資逾三千七萬，每呎近兩萬三。
呢四個係三、十一至十三號舖，面積由近三百至五百零呎，共逾千六呎，估計月租可達二十萬，呎租超過一百，回報逾六厘。
政府撤銷租管，唔少人都以為對樓市有幫助，買賣會增多，但祥益地產副營業董事張才權就大歎事實並非如此，好似屯門市廣場咁，啲業主寧願將單位放租，都唔肯平賣，所以七月至今，得番兩宗買賣，上個月有五宗。本月比年初高峯期嘅十五宗，勁減近九成。
屋苑𠵱家有百二個放售盤，叫價每呎千六至千九，若果樓價維持高位，估計下個月成交都唔會多過五宗。
張才權話，屯門市廣場放租盤二十五個，比上月多兩成，呎租七蚊，放盤三日至一周就有承接。
今年唔少地產代理都搵到錢，所以吸引好多新人想入行，中原地產最近再搞招聘活動，反應幾踴躍，聽講，有啲質素重好高，連外國畢業生、甚至碩士生都去面試。
今年以嚟，中記已經舉行咗近二十次招聘活動，人事部經理鄭淑玲指出，公司發現，年輕人入行興趣大咗。
蘭西
電郵地址：
