美股前晚上演絕地反擊戰，杜指大升123點，納指跳高30點，港股好友諗住得米，點知恒指昨日高開81點後，竟然反覆向下，結果只係升得18點，真係睇見都心翳。
杜指同納指均似形成「早晨之星」，美股短期見底機會頗大。港股昨日冇跟美股升，一則因為近期相對美股跌幅細，二則可能同期指今日結算有關。本港大藍籌即將公布業績，照計點都好過舊年有沙士之時，只要美股穩步回升，港股遲早跟上，炒輪始終係搵Call買。
地產股依然穩好，恒地（012）、新地（016）都有進帳。長實（001）差啲，跌1格，收58.75元，相信好快會追番上嚟，長實Call輪要吼低買，主角係9389，呢件11月中屆滿，現價50仙，溢價3.6%，槓桿率11.8倍，數據唔錯，成交亦足，上車落車都唔難。
想揀大啲槓桿，9227可以考慮，11月10日屆滿，現價40仙，槓桿率14.7倍，溢價畀高些少，要5.5%。
後市向好嘅機會睇嚟大啲，恒指Call輪值得留意。對象有3件，遠期嘅揀9911，12月30日到期；唔遠唔近嘅揀9971，10月28日屆滿；近期揀9773，玩到9月28日。呢3件都係成交大兼買賣差價貼，啱炒。
章盛