幾間英超球會最近鬥搶塞內加爾球員，重透過傳媒，隔空展開連場罵戰。我求大俠實在覺得佢哋好鬼無謂，分分鐘重將垃圾球員當做寶㖭！
富咸啱啱由朗斯簽入塞內加爾國腳迪奧比，跟手樸茨茅夫主席文達歷就指摘富咸「搶嘢」，謂富咸主席阿法耶茲以本傷人，出更高價錢搶人。
另一邊廂狼隊重同保頓爭拗緊前鋒H卡馬拉轉會事宜，保頓領隊艾拿迪斯好唔客氣，直情話狼隊領隊鍾斯廢話連篇！
雖云同行如敵國，但其實一直都未有塞內加爾球員能夠喺英超聯證明實力，就連非洲足球先生迪奧夫，來季重有冇得繼續踢利物浦都唔知。為呢班球員嘈？咪咁無聊啦。
早兩日英國班行家言之鑿鑿話，朗尼未婚妻高蓮因不滿朗尼「偷食」而分手，而且重將隻價值二萬五千鎊嘅戒指掟去松鼠保護林。不過到周三，事態發展急轉直下，高蓮話佢哋冇情變不特止，重戴埋隻戒指晒幸福。擺到明，原來掟戒事件又係班英國報紙佬老作。
馬拉當拿時代嘅拿玻里曾經雄霸意甲，而呢支褐色勁旅日前因為缺財唔符合意乙註冊要求，被罰來季降落丙一組角逐。不過更慘嘅係安科納，上季重好好哋踢甲組，最後降班，家陣同拿玻里一樣因缺財被罰落丙一。一季內連降兩級，只因球會財政唔掂，安科納球迷肯定傷心死。
國際米蘭周二兵分兩路踢熱身賽，分別係角逐國內TIM盃，同埋遠赴日本友賽浦和紅鑽。話晒老遠去日本踢波，無非都係想宣傳自己隊波、開拓市場，不過國米呢場波只派托度同埋列高巴，拖一班後備球員，而教練文仙尼亦冇隨行。國米好似唔緊唔緊咁，唔通睇唔起㗎仔市場？
估唔到堂堂男子漢嘅荷蘭國腳尹邦美，思想口徑都會扭扭擰擰。呢位燕豪芬中場，就愛華頓想斟佢嘅傳聞回應謂佢係想轉會，但就想轉間大球會；好似愛華頓咁，連燕豪芬都「大」唔過，就唔會諗嘞。咁佢當日又開晒口話想加盟熱刺？難道近季表現比愛華頓更差嘅熱刺又好大？