舊年年底退休嘅警務處前「一哥」曾蔭培，噚日以新創建集團執行董事身份首次見傳媒，呢位警隊前一哥風采依然，講到份新工，佢話只係啱啱返咗個幾月，好多商場嘅嘢重要繼續學習，但佢相信可以好快適應。八方問佢點睇最近廉署高調搜查七間報館事件，前一哥反應好快咁同八方講唔會作任何評論，至於新辦公室有冇裝置反竊聽設施，佢都笑住話：「我真係唔會評論。」
曾蔭培嘅新辦公室雖然冇以前警隊一哥辦公室咁大，但布置雅致，最離奇係擺咗張巴基斯坦總統穆沙拉夫舊年途經香港，喺香港機場同佢敍舊嘅相，原來佢兩個曾經同一時間喺英國國防學院進修。另外當然唔少得佢孫女凱明嘅生活相，提起精靈可愛嘅孫女，曾蔭培就笑不攏嘴，佢話孫女已經兩歲大，𠵱家讀緊幼兒班。
傳真︰2623-9278
電郵︰