前日ASM太平洋（522）公布中期業績，盈利上升2.2倍至逾6億元。噚日股價一度升上去最高29.95元，但即刻見到大量沽盤出現，結果全日只升3.1%，收28.05元，成交股數347.8萬股，金額9947.9萬元。經紀黃話，唔排除有芬佬趁好消息出貨。
經紀黃又話，全世界都預期半導體行業增長放緩，因此ASM本身業績雖然好掂，但由於芬佬已唔當半導體係高增長行業，唔會再畀太高溢價呢類股份，相信ASM亦難獨善其身。
連一直捧開ASM場嘅歐資證券行，噚日所出嘅報告亦露端倪，雖然繼續力撐話要買入ASM，但目標價卻由出業績前的49.50元，下調至34元，心水清者應該明白係乜嘢一回事。
另外，永義國際（1218）公布業績由虧轉盈兼有息派後，股價連續兩日大升，但經紀陳同小初等愛冒險之徒，暫時未有意欲買入。呢系股票過去一升就抽水，希望佢今次能夠改變形象。
永義噚日再升12.4%，收0.154元，成交股數1.33億股，金額1974萬元。
慕容小初