劉漢銓冇碇落腳、飛天朱想直選點知又慘遭勸退，親中保皇嘅港進聯變咗泡沫黨，好好彩蔡素玉跳船跳得快，否則一齊玩完。
咁就證明，工商界親中舔黨，唔係淨係靠狂嗌愛國挺董口號，中共就會睇你一世。中共都好實際，餵咗你咁多年奶水，次次都上北京人民大會堂加貴賓接待酒店食宿招呼，三餐酒水、燈油火蠟，蚊蚊人民幣都係成本，養兵千日，靠你攻佔立法會，若然缺乏選舉能力，國家就會當你「完成歷史任務」，好似隻狗咁，老嘞，行唔郁，吠又冇力，重浪費狗糧做乜，不如人道毀滅。
今日就港進聯，明日又輪到邊個黨呢？係自由黨定民建聯？親中愛國山頭好自為之，胡溫自己都講緊提高執政能力。一個親中政黨冇競選能力，一樣會清場。
喺中共眼中，民建聯點都親啲，谷佢交功課，阿媽亦會全力幫。之不過，自由黨就冇咁親嘞。第一係創始人物李鵬飛，雖然早年反肥彭有功，但近年頻頻反中共張枱，早已激到國家出唔到聲。
所以中方出暗力支持謝偉俊郁自由黨叔父楊孝華。阿Paul新嚟新豬肉，不過喺旅遊界人面甚廣，一句：「霸住茅廁不辦公」，話老楊十二年來未瞓身支持過旅行社利益，就搞到「哈活」陣腳大亂。
最麻煩嘅就係，本來老楊應承過同樣係自由黨嘅葉慶寧，做埋呢屆就會畀佢上位，但因為謝偉俊個勢太勁，哈活改變主意，決定親自上陣。葉慶寧條氣唔係咁順，堅持要出線，聲稱要「打散謝偉俊啲票」。係打散阿Paul啲票，定係分薄哈活呢？咁就難講咯。
不過咁就變咗一個黨，有兩個候選人。傳聞老楊以叔父輩下令，葉慶寧要退出自由黨至准選，搞到兩人對罵，未選先在功能組別內訌。
旅遊界同業好多都私下歎息：同旅遊界做嘢，又唔見「哈活」咁打拼，多個人爭位就咁緊張。去年七月，哈活有一次去台北，返嚟就話同市長馬英九密斟，成功爭取到馬市長放寬港人免簽證去台灣。點知有知情人士踢爆，呢樣嘢係阿扁至有權，台北市長根本冇資格批免簽，台北肯放水，高雄唔肯又點呢？何況當晚馬市長重話，唔識得楊孝華㖭。
更值得注意嘅就係，親中報刊好睇謝偉俊台戲，報道全力催谷，《文匯》嘅專訪，落阿Paul嗰張相，重刻意揀張最靚仔嘅㖭。共黨最識透過圖片玩政治㗎嘛，哈活近年圍剿民主派不力，國家谷住條氣，今屆45條關注組多名大律師殺入立法會，睇嚟旅遊界組別，都要換吓一個年輕化兼撐得住場嘅PatPat坐上去嘞。
傳真︰2623-9278
電郵︰