期指結算前夕，港股大部份時間都在窄幅上落，外圍美股雖然大幅反彈，但港股僅在開市時略有反應，而最高亦只係升得81點，其後就打回原形。恒指收市12320，升18點，成交又縮番到只得80億元。
其實，港股呢輪個勢比外圍強好多，但美股止跌回升，港股反而跟唔上，其中一個原因，係咁啱咁蹺，整咗單中石化（386）會有「披成」嘅消息出嚟，當堂嚇窒一眾大中小戶。結算前夕傳出咁有「阻嚇性」嘅消息，時間校得啱啱好。
披成不利股價，中石化自然首當其衝，低開之後，質到2.95元，收2.975元，跌0.1元，成交1.19億股，就比上日大增75%。中石化跌穿3元大關後，見到大行嘅買盤前仆後繼，特別在2.975呢個位，估計佢哋起碼接咗60至70球，看來好戲在後頭。
石化股個別發展，鎮海煉化（1128）依然好強勢，高收8.35元，升2.4%，北京燕化（325）則紋風不動；至於上海石化（338）同儀征化纖（1033），沽壓則較重，特別係儀征，俾「波仔」㩒足成個禮拜，相信要等大戶完成部署，一舉而衝破1.5元阻力，先有作為。
埃克森美孚考慮出售所持的中石化股權，消息來自英國《金融時報》；不過，成篇報道冇實質內容，只係話有關公司希望透過配售減持股權，規模如何未定，亦未有時間表。至於早前有消息話QDII有阻滯，亦係《金融時報》嘅「傑作」。
中石化午後迅速作出回應，話未聽過埃克森美孚有售股計劃；若策略性股東售股，中石化係會預先獲得知會。埃克森美孚持有中石化19%股權，以現價計算，若全數出售，可套現接近100億元。
彩星集團（635）打出宣布日期，股價立即有反應，搶到上1.15元高收，升7仙，升幅6.5%，成交更去到1725萬股，比上日大增4.7倍，今次突破上升三角形阻力，且有大成交支持，量度上升目標指向1.55元，中線有力重上2元水平。
彩星近期取得Delgo同AtomicBetty兩個玩具總特許權，好大機會繼忍者龜後，創造另一個神話。
郭兆誠