做咗十八年立法會議員嘅司徒華竟然老貓燒鬚，前日去游咗十幾年水嘅尖沙嘴香港基督教青年會泳池，竟然入錯女更衣室，搞到俾泳客投訴！
呢位投訴人打去多間報館報料，話YMCA泳池有兩種更衣室，一般街外客用普通更衣室，加入咗健身會嘅泳客就用健身室嘅更衣室，前日早上九點幾，有女泳客赫然見到華叔喺健身客用嘅女更衣室行出嚟，身上只圍住條大毛巾，見到人亦冇講sorry，即刻就走咗。
八方即刻打去問華叔發生咩事，華叔坦然承認係無心之失。原來華叔以往做議員太忙，唔係成日有時間去游水，所以十幾年都係逐次買飛入泳池，但呢次唔再選立法會，多咗時間，最近就用咗三千幾蚊入咗YMCA嘅健身會，唔使每次畀錢游水。
華叔話初次去新更衣室，加上游水冇戴眼鏡，所以行錯地方。不過，華叔話入咗女更衣室唔夠十秒，就被清潔女工叫返轉頭，至於點解唔向人講對唔住？華叔話冇戴眼鏡，乜都睇唔清，連有冇人沖緊涼都唔知，加上只想快快離開，「唔通重行埋去同人哋講對唔住咩！」
（圖）華叔：「我係無心之失！」
傳真︰2623-9278
電郵︰