早晨，各位聽眾早晨，早晨梁文道，早晨蔡子強，喺呢一度我想先以正視聽，「解僱大班」呢四個字係不確嘅，事實最近有好多傳言，好多揣測，甚至有啲周刊用好煽情嘅字眼，不盡不實咁話我怒炒大班魷魚，呢啲都係非常咁唔正確，我希望喺呢一度記錄在案，我哋係從來無炒大班呢個動作。
喺冇幾耐之前，我哋同大班有啲往還書信，討論一個停職留薪嘅安排，直至大家研究出一啲圓滿嘅答案先至作道理，但後來呢啲談論演變係咪先尊重合約精神，提早解約，係一件咁嘅事，所以所謂嘅炒魷呢啲嘅字，喺呢度係用唔上。
點解嚟到呢個大家討論大家尊重合約精神之下提早解約呢個境地，咁我要講講商台嘅立場，呢段時期我哋保持緘默，對一切不予置評，主要係希望喺幾方面，喺大班、林旭華、梁文道、蔡東豪，呢啲管理層嘅同事同埋公司董事局，大家希望完全有晒共識，圓滿嘅境界，先至作一次澄清，同埋係將紀錄完全披露。
今日既然社會上邊咁多人士，認為要有迫切需要解釋吓，咁我哋講番啲好基本嘅問題。
商業電台，就快台慶，45年來，我哋以社會責任行先，緊守我哋傳媒崗位，對捍衞言論自由從來都奮不顧身，勇戰到底，無懼無我，只求做到無悔無愧無憾。我哋年代復年代，義無反顧，為言論自由築起最寬廣嘅平台，但好可惜，前一陣子，我哋睇見喺我哋呢個平台之上，竟然一次又一次被用嚟引證，威嚇會令正義出走，言論會因為畏縮而失去自由，呢啲事件對我哋電台、對我哋同事，帶來無邊震撼，當然亦都係莫大嘅遺憾。
不過好彩，雖然封咪事件接二連三，絲毫無打擊我哋嘅士氣，反而逐步顯現更清晰嘅畫面，畀我哋掌握問題嘅癥結所在，壓力旋即昇華，變成嶄新嘅動力，帶動我哋反覆辯證，多角度，重新計算應該點樣面對未來，對捍衞言論承擔，我哋當然照舊一步不退，對節目編製方針，我哋有更深體會，一群新銳之氣，同樣放眼世界，胸懷社會，無畏無懼，不亢不卑，繼續實踐商台相信嘅道路，喺佢哋背後會有更全面嘅製作支援，更精準嘅理據分析，更開豁嘅討論平台，我哋決定唔再過份倚仗感性嘅宣洩，反而加強肯定理性嘅處事方法，因為我哋知道，香港嘅環境愈嚴峻，我哋嘅情緒愈要控制得宜，咁樣頭腦先要更加清醒，視野先至會更加澄明。我可以向大家保證，對推動自由空氣嘅意義同埋決心，我哋係從未如此清晰過，喺未來日子，商業電台自當繼續不離不棄，用聲音擁抱真理，希望市民大眾，從心呼吸，我哋嘅新時代新氣候，隨時監察我哋，不吝指正。