廉政公署搜查七間報館，包括《蘋果日報》在內，轟動新聞界。兩個平時慣打貪污案官司嘅律師亦被廉署邀請協助（或說是拘捕），更加令人驚一驚。
有新聞自由嘅地方，較少貪污，此乃普遍真確嘅事實，新加坡除外。冇新聞自由嘅地方，貪污賄賂罪可以成為政府打擊政敵或者記者嘅藉口，俄國尤斯科案、廣州新聞編輯案，都係例子。傳媒好乖，聽晒政府話嘅地方，反貪污嘅官員都可以成為政治鬥爭嘅犧牲品。反貪防貪，傳媒係廉政機關嘅最佳拍檔，希望香港一啲話得事嘅人記住，佢哋千祈唔好沖昏了頭腦。
《虎報》董事總經理JohnBerthelsen在七月二十六日撰文，指廉署突擊搜查報館，可能傷害新聞自由。佢引述美國偉人杰弗遜（ThomasJefferson）嘅名言：「政府建基民意，此為第一要務。假如只有兩個選擇，一為有政府無報紙，一為有報紙無政府，我毫不猶疑地選擇後者。」呢句說話出自杰弗遜喺一七八七年一月十六日寫畀EdwardCarrington嘅信。偉人即是偉人，杰弗遜喺二百一十七年前已有此偉大胸襟，至今我哋嘅領導人仍然唔明白其中精義。
杰弗遜在信中補充話：「所有人民都應該可以閱讀報紙，及能夠睇報紙（即是要掃除文盲）。」佢認為當時嘅歐洲（十八世紀末）國家有兩類人，一類係豺狼，另一類係馴羊，統治階層與富貴階級係狼，人民係羊，任由狼咬到遍體鱗傷。只有在民意得到尊重嘅地方，人民注意公共事務嘅地方，人民先至唔會成為狼嘅美味食品。左丁山認為杰弗遜嘅微言大義在於，如果我哋唔行使公民權，唔投票，唔保衞新聞自由，我哋就係一群馴羊，成為豺狼的點心。