美國搖滾癲后葛妮洛芙（CourtneyLove），上年十月涉嫌喺服用咗可卡因之後擅自闖入前男友屋企單官司，前日終於宣判。早前缺席聆訊而被通緝嘅葛妮，前日喺事發後終於公開露面，最後俾法官裁定佢要接受年半戒毒療程，事後葛妮重對裁決表示好有趣。
葛妮前日一身粉紫色套裝現身洛杉磯法院聽審，佢出庭時又再遲到十五分鐘。據講葛妮當日喺庭上面心不在焉，不時掛住睇音樂雜誌，聽到對自己不利嘅判詞時又會搖搖頭。
事後法官宣判佢未來年半要接受戒毒療程，其間佢重要定期接受毒品測試，又唔可以服用未經處方藥物、飲酒，甚至流連喺有酒賣嘅地方都唔得㖭。但鑑於葛妮𠵱家正喺度宣傳大碟，所以法官准佢最遲喺十月二十九日先開始療程。
當宣判完之後，大堆記者喺庭外擁住葛妮，葛妮一出到法庭就點着煙仔吞雲吐霧，佢對於裁決表示：「佢哋叫我戒酒喎，真係有趣！不過我諗我會做到！」其實葛妮今次呢單案總算結束，不過佢身上依然有三單襲擊傷人罪纏身，喺今日葛妮又要為另一單案上庭。