老董呢輪無端端被老廉害，本來近來好地地，忽然殺出單搜七大報紙嘅事件，搞到佢不得不接招，因為講到尾，老廉係佢嘅特派專員，只向特首一人負責。好彩，老廉根基深厚，公眾形象冇得頂，所以市民重好支持佢哋，手執支筆嘅傳媒亦冇乜優勢。當然八方要申報利益，梗係唔贊成老廉咁樣搜傳媒機構同埋扣查記者。
聽講特首都係老廉搜查行動前一分鐘先獲知會，好似真係冇乜干預，姑勿論事件本身嘅對錯，好多人都寧願保留廉記嘅獨立性，好過被老左有機可乘，迫老董插手。搞到咁陰謀同複雜，老董唔知識唔識處理。
不過，一切都有待發展啦，老董呢個星期日都先鬆一鬆，同大班議員去睇閱兵。噚日，佢就喺禮賓府同到訪嘅約旦國王阿卜杜拉二世會面，商談甚歡。
（圖）老董喺禮賓府同到訪嘅約旦國王阿卜杜拉二世（左）見面。
傳真︰2623-9278
電郵︰