城中一位公子哥兒近排經常春風滿臉，每當記者提到佢同女朋友嘅嘢，佢都笑到四萬咁口。不過馮仁昭就八到佢未同女友拍拖之前，原來追過佘詩曼。嗰位公子除咗猛向朋友話佘詩曼靚女外，重讚佢夠嗲，若果俾佢電兩電，就一定冧到痹！
不過公子知道狗仔隊神通廣大，原本佢好想叫人安排飯局結識佘詩曼，但又怕俾人偷影，思前想後，終於俾佢諗到絕世好橋。公子本身擁有一艘遊艇，最安全莫過於請佘詩曼上船玩，將隻船駛出海中心，咁樣就唔怕俾人偷影，咁點玩都冇有怕啦！不過馮仁昭八到佘詩曼請咗公子食幾次檸檬，因為佢寧願同陳浩民交往。馮仁昭覺得喺呢件事上，佘詩曼都幾重情義，冇為識到金龜就拋開男友，都幾難得！
彭羚同老公林海峰已經育有囡囡林泳，噚晚佢哋嘅第二名愛情結晶品終於出世。林珊珊噚晚去養和醫院探完彭羚，證實彭羚又生咗個女。而林曉峰（阿Lo）同大住肚嘅老婆康子妮，噚日拍住拖去醫院，睇怕佢哋都係去探彭羚。
吳君如噚日喺黃埔出席有線娛樂新聞台一周年生日會，講到佢嘅舊愛杜德偉近日為咗宣傳唱片，連褲都除埋，君如笑笑口話唔知杜德偉以前嘅身形係點，但以佢呢個年紀嚟講，身形真係keep得好好。問君如陳可辛同杜德偉邊個身形好啲？佢就笑得鬼咁大聲咁話：「我兩個都未睇過，我哋啲好含蓄嘅，唔好問我啦，我會面紅㗎。」睇怕君如都心裏有數囉！
莫文蔚（Karen）日前幫化妝品牌MaxFactor的迷鑽彩妝系列拍廣告。為咗增添閃爍奪目嘅效果，Karen除咗佩戴五百萬美鑽首飾外，重請嚟名設計師設計充滿五十年代色彩嘅低胸裙，但Karen見到條裙覺得太性感，所以就即場借咗工作人員嘅比利時古董喱士拼上胸前嚟遮遮掩掩，不過Karen咁有本錢，應該冇有怕先係喎！
梁詠琪（GiGi）噚日接受新城電台訪問，佢話前日急急腳去買自己嘅新碟，因為佢聽講隨碟附送嗰隻VCD會有佢嘅「床戲」，佢擔心係俾工作人員偷拍到瞓覺時個樣。GiGi話：「原來只係影咗我喺床度打咗兩個觔斗啫。入面又有我影嘅嘢，我本來影咗化妝師同髮型師露兩點，但因為尺度問題，所以剪咗。」唔知有冇fans因為有床戲睇而去買GiGi隻碟呢？
歌神許冠傑下個月再加開兩場演唱會，噚日公開賣飛，喺個幾鐘裏面差唔多賣晒，重有人唔願走，想睇吓偶像會唔會出現。排頭位嘅女士話前一晚開始排隊，雖然佢咁早到，但買飛時依然好心急，不斷向票務員講「快、快﹗」似睇緊賽馬多過買飛。而主辦商丘亞葵噚日喺電話中話最貴同最平嘅飛已經售罄，只剩小量中價飛。
陳芷菁、陳啟泰同陳煒噚日喺尖沙嘴出席「亞視七月生日會」，問陳芷菁點樣同老公慶祝，佢話：「佢送咗張音樂按摩椅同LV手袋畀我，點知張按摩椅佢係第一個坐落去。」
至於陳啟泰話生日嗰日打八號風球，第一次打風中過生日，好彩老婆煮餐勁畀佢食。
