李超人旗下TOM集團一向猛人多，除咗生意奇才之外，重收埋好多運動健將。先有好跳得的「TOM安拉」首席執行官王雷雷，咪睇佢大大份，最高紀錄跳過1.88米，達到國家二級運動員資格。另一個就係噚日首度同香港傳媒見面、好打得的戶外媒體業務話事人李踐。有幾勁？佢係中國跆拳道運動發起人之一，八六年喺昆明建立咗中國第一間跆拳道組織，而國內傳媒就尊稱佢為「中國跆拳道第一人」。李踐細時家貧甚至試過行乞，後來為保護自己開始習武，到八二年迷上跆拳道。李總話𠵱家係黑帶七段，但忙得滯冇時間再攀高兩級（最高係9級），而閒時會教啲同事一兩度散手傍身，唔知第時李總使唔使做多一瓣──負責訓練超人成家啲保鑣呢？
（圖）李踐係跆拳道高手。
傳真︰2623-9278
電郵︰