中聯辦兩個副主任周俊明同黎桂康，噚晚喺中聯辦開咗四圍「解穢酒」，宴請就嚟散檔嘅港進聯，多謝呢個黨「成功」完成歷史任務。
周黎二人多謝港進聯喺過渡期，為穩定香港做嘅功勞，周俊明就贈港進聯十六個字：「海納百川、有容乃大。壁立千仞、無欲則剛」。最尾嗰四個字係咪暗示港進聯，你哋唔好諗去選立法會？
黎桂康就引李白嘅詩「行路難」送畀港進聯，重「勉勵」港進聯要「乘風破浪、扯好風帆、駛出滄海、自強不息，再創輝煌嘅明天！」港進聯班友仔，個個喺度愁個黨會唔會解散，黎副主任重叫呢個從來冇輝煌過嘅黨，「再創輝煌明天」，唔知係攞景定係贈興呢？學老董賴死唔走、背詩最叻嘅劉漢銓，重好厚臉皮咁，多謝兩個副主任嘅關心。
但係港進聯嘅成員唔係咁諗，有友好同八方講，𠵱家重有兩個副主任出嚟撐，其實都算係咁，呢餐飯係慶祝港進聯成立十周年，所以請成四十幾個人，希望個黨真係生生性性，搞番好啲，唔好令副主任再失望啦。
傳真︰2623-9278
電郵︰