就快八月到，高官紛紛安排外遊，鬆一鬆、唞唞氣。呢日到大班飯堂食飯，碰到高官，問佢是否到了八月，便有鬆懈感覺，神經線唔使拉得咁緊？高官話：「梗係要放假啦，全年都面對立法會議員，好緊張㗎。」
今年高官可以放假，議員就好唔得閒，成個暑假都要為連任搏命，辛苦過碧咸、施丹。劉慧卿經常大罵局長，好唔客氣，高官亦俾佢潤過，佢對劉慧卿點睇呢？高官話：「老實講，某些議員比較懶，唔做功課，開小組會議時一問問題，就立即露底，我哋知道好容易應付，佢哋想有個soundbite，俾傳媒報道之嘛。但有啲議員真係好勤力，睇晒啲文件，我最怕俾呢啲人追問，劉慧卿係其中之一，雖然久唔久就俾佢窒，但我尊重佢，佢真係做嘢㗎。」
左丁山聽到都好愕然，諗唔到高官竟然會讚賞劉慧卿。不過任何勤力議員一定俾高官認得，昅住，此乃世界通例。劉慧卿與泛民主派組成鑽石名單，劉江華自稱係希臘，民主派係皇馬，大家唔好以為皇馬會踢贏希臘喎，劉江華呢句話好厲害，唔怪得佢有沙田鐵票，空降新界東嘅田北俊遇到嘅對手好強，地頭蟲黃宏發經營已久，長毛梁國雄上屆一鳴驚人，幾乎入選，今屆又如何呢？新界東勢必殺到頭崩額裂，未知鹿死誰手。皇馬隊粒粒皆星，上場就一盤散沙；希臘隊係爛頭蟀，鬥志頑強，九月十二日呢場波，好睇過走馬燈。
選舉係表達民情嘅最好方法，有選舉好過冇選舉，直選好過間選，全民投票好過小圈子投票。九一二係我哋嘅大日子，希望所有選民都出嚟投票。