最近球壇潮興由國內名宿當上國家隊教練一職，保加利亞及德國呢兩日先後落實，將由史杜捷哥夫及奇連士文做新教頭。我求大俠先祝佢哋避得過「名宿教國家隊必輸」嘅魔咒！
事關近年都有唔少國家隊由該國一代球星執教，好似波蘭嘅邦歷克、羅馬尼亞嘅赫傑、前南斯拉夫嘅沙維斯域等等；但幾乎全部都只係做得一年半載，就會因為球隊戰績愈教愈衰而被炒或引咎辭職。
而史杜捷哥夫更表明，將以嚴明軍紀領軍。但係呢位保加利亞球王，喺球員時代出名臭脾氣，紀律麻麻，𠵱家重話要麾下球員守紀律？冇乜說服力喎！
阿根廷世青盃猛將卡雲拿基，周一獲俄羅斯球會莫斯科斯巴達證實加盟。我求大俠真係覺得意外，從來都冇乜南美年輕球星喺俄羅斯球隊打響名堂嘅例子，當地又天寒地凍，完全同南美係兩個世界，點解佢都要選擇加盟呢？唔通佢唔係「新巴迪斯圖達」，係「新斯巴達」至真？
去年卡塔爾真係搶盡風頭，簽咗好多過氣球星，希望幫吓國家隊提升實力，爭○六世盃入場券；估唔到只係一年時間，呢個計劃已行唔通，簽唔成出名嘅三件巴西兵國家隊亞洲盃出局教練杜斯亞走人，過氣球星好似會去保頓嘅希亞路就搵夠錢走。要搞好足運真係唔易㗎！
英格蘭新星前鋒朗尼背住未婚妻高蓮「偷食」，搞到高蓮喺星期日同佢分手，但呢對小情人喺星期一火速「復合」，兩人重喺高蓮屋企門口「借位親吻」；但就俾英傳媒踢爆係場戲，高蓮手上已唔見朗尼畀佢嘅訂婚戒指。據佢哋朋友講，戒指已俾高蓮拋咗入松鼠保護區嘅樹林入面！
希臘今屆捧走歐國盃功臣之一嘅前鋒查列斯迪斯，喺星期一歸隊向德甲嘅雲達不來梅報到。佢歸隊後第一句話，就係要求踢正選，佢話：「我唔想好似上季咁做後備，我要踢正選，同乜嘢球員拍檔都唔緊要。」查列斯迪斯喺歐國盃決賽同八強都係入球英雄，又抵佢大口氣。