近排樓市唔見得好旺，不過伙數近萬嘅鴨脷洲海怡半島，近日竟然出現買家搶貨，而且一連兩宗。
作為業主嘅，計過數可以袋多啲，自然肯賠定重售；對於代理嚟講，當係做多一單成交，佣金雙倍；至於買家，雖說蝕咗時間，不過賺番幾萬蚊定金，聽落都冇壞。唔怪得美記林潤強話，賠定重售成交，多多益善。
一單係三十三座低層D，逾六百六呎，成交價逾二百二萬，每呎近三千四，扣除賠定費用及佣金等，仍執多近八萬。另外，一座中層E，六百四呎，作價逾百八萬，每呎近二千八百六，業主袋多六萬。
西灣河嘉亨灣會所係一大賣點，發展商恒基不厭其煩，分幾日推介，噚日輪到介紹「長者天地」，有園林茗茶角同茶藝間，設茶藝品茗班及書法班。
恒基趁機搵茶藝樂園品茗專家，同埋書法家，即席示範泡茶與書法，將來長者住客大把節目，唔悶。
長者天地日後安排舞蹈名家辦社交舞班，歌手袁鳳瑛、曾航生教長者唱歌。有見及此，恒基老臣子、營業部副總經理吳仲康即席獻唱，唱番隻「香港靚女多」，兼且示範標準舞口訣及步法，等大家睇吓將來住喺嘉亨灣嘅長者，都有佢咁犀利。
蘭西周初提到長沙灣宇晴軒，有投資者沽出相連戶，賺近二百萬。噚日3座50樓C同D室業主來電，指個相連戶購入價係五百一萬，今次以五百二十六萬賣出，僅係平手離場。
業主重話，佢係同拍檔喺四月買入。佢補充，今次賣出呢個相連戶後，冇跟住買入同座樓下嘅相連單位。
資料顯示，呢個相連戶面積一千二百九十一呎。
樓市悶局未破，買家置業，可以慢慢揀到啱心水為止，但仍有買家急急入市，美記曾令村話，鰂魚涌太古城南山閣高層H，放盤半日，已經有買家即刻用逾二百四萬承接，單位六百三呎，呎價近三千九。
聽講，買家係區內投資者，因為撤銷租管，打算買樓收租，又見呢個盤係園景優質，呎價合理，所以一睇就扑鎚。
太古城今個月已有三十五單買賣，上個月全月都只不過三十宗。
撤銷租管，吸引投資者入市買樓收租，有啲就揀屯門二手居屋，貪佢平。
祥益地產營業經理黃振文話，兆康苑近日有單位以四十七萬易手，單位近五百七呎，計落每呎八百二十六。以單位月租可達三千二計，回報率高見八厘二，好過擺喺銀行收息。
黃振文指出，西鐵通車之後，兆康苑呎價曾高見千二蚊，但𠵱家只係得番八百零。
蘭西
電郵地址：
