雅典奧運快到，除咗一班奧運選手個個勤於練習備戰之外，原來日本一班水着女星都好瞓身支持奧運㗎。早前佢哋就為日本雜誌《B.L.T》拍咗一輯以運動為題嘅寫真，為奧運健兒打氣。
𠵱家喺日本富士電視台播出嘅日劇《水着少年2》度扮演Miss嘅井上和香，原來喺咁多項嘅奧運比賽中，最期待睇足球比賽，佢話到時一定會落足力幫日本國家隊打打氣㖭。
拍攝嗰陣，井上一着起套波衫，就忍唔住要嚟番兩腳，表演一吓佢啲射門技術咁話。雖然未知井上嘅球技如何，不過我大口羅拉就覺得井上嗰對粗壯嘅小腿，的確同甲組球員有得Fight！
而最近喺日本憑住爽朗嘅性格，愈嚟愈受歡迎嘅若槻千夏，既要定期上電視綜藝節目做嘉賓，又忙住拍廣告。而若槻就話如果有得畀佢揀參加其中一項奧運比賽，佢就一定會揀乒乓波喇，因為佢只係識得呢一項運動喎。不過睇見若槻揸起球拍扮扣殺，又幾似模似樣噃。
至於平日着慣水着嘅熊田曜子就話，佢讀書時候好鍾意跑步，而且重跑得好快，喺學校嘅陸運會都參加過唔少次接力賽㖭。至於近日收起性感水着專心做歌手市川由衣，就同大多數日本人一樣最愛棒球喎。