日股散128點，其中77點係本港時間12點半收上晝市之後出現。港股下晝市唔多得，受呢段時間日股下跌所影響。
恒指下晝3點06分最低12250，跌過69點，其實幅度亦唔大。恒指跌得最多時，滙控（005）造114.50元，跌1元。呢1元，代表扯低恒指36點。恒指全日跌18.51，滙控收報115元，跌0.50元；恒指跌幅，幾乎啱啱就係滙控下跌所導致。
個市想好，暫時只欠東風。東風就係外圍，尤其係美股，外圍一旦向好，港股隨時上三幾百點。美股有見底迹象，杜指前晚最低9913（收9961），同5月低位9852相差61點，未必要低試呢個位先至回升。揸住錢，有平貨要開始收集。
地產股輪流郁，鷹君（041）升完之後到信置（083），呢兩日新世界（017）有嘢睇，昨收6.70元，升15仙，跑贏其他地產股。新世界有3隻Call輪，其中9560同9591係X輪，分別彈升25%同9%，佢哋好貴，除非正股升得非常厲害，否則最後好難有好結果。正常Call輪得隻9667，收7仙，升17%，明年2月到期，溢價42.3%，槓桿率10.6倍，你買埋我份。睇好新世界，冇法子，只係適宜買正股。
大唐（991）冇郁，Call輪9222升17%，收55仙，下月尾到期，溢價4.6%，槓桿率11.2倍，買唔過。9360比較實際，10月初夠鐘，輪價1.32元，溢價2.8%，槓桿率4.7倍，但嫌成交太少。
章盛