官恩娜自從做咗許冠傑演唱會嘉賓後，即刻人氣急升，佢唔知係咪被一時嘅勝利沖昏咗頭腦，居然未紅先驕，對同事態度惡劣，重呼呼喝喝㖭。
話說喺上個禮拜五下晝十二點幾，官恩娜喺灣仔君悅酒店嘅ILColop髮型屋整緊頭，有人見到佢同位男同事傾緊一啲工作上嘅問題，官恩娜居然好惡咁同個男同事講：「唔做呀！你當我係狗呀？」成間髮型屋啲人當堂被佢嚇親，個男同事即刻尷尬行開。
後來嗰位男同事又去同官恩娜講嘢，跟住官恩娜就喊咗出嚟。據知官恩娜嗰日原本要去時代廣場舉行處女碟宣傳活動，後來佢以病為由取消咗，佢嗰日明明有去髮型屋整頭，睇嚟都係因為激嬲咗經理人公司嘅同事，所以搞唔成活動啦。
噚日官恩娜就死撐話冇同人拗撬，自己亦都冇喺髮型屋喊過，不過佢嘅經理人鄭先生噚日就話：「公司同佢係有啲問題發生，𠵱家正在處理中，官恩娜喺待人接物方面重有好多嘢要學，但最緊要識得點尊重人。」
馮仁昭聽聞官恩娜同佢所屬嘅經理人公司近排發生咗一啲拗撬，但都係圍繞工作問題，作為新人聽話肯捱，對人有禮係基本法，如果官恩娜連呢啲都做唔到，真係隨時變成一碟歌星㗎。
雲妮侯斯頓（WhitneyHouston）今晚喺會展舉行演唱會，噚日唔使綵排，佢兩公婆就留喺酒店，當佢老公BobbyBrown行咗出酒店，就好友善咁同記者講話老婆喺咖啡室度同人傾緊偈，不過佢食緊煙，所以唔多鍾意俾記者影相，之後重搵咗三個大隻佬保鑣嚟趕記者離開。而雲妮喺夜晚八點就同老公去咗文化中心睇激光表演。
九月喺意大利舉行嘅威尼斯影展，有份參展嘅港片除了有杜琪峰嘅《柔道龍虎榜》外，重有鞏俐同張震主演嘅《愛神》，何超儀主演嘅《蝴蝶》亦有報名參選。鞏俐同張震都答應會去威尼斯影展，不過今次只係觀摩性質，所以張震嘅心情比較輕鬆，至於阿杜套《柔》片喺香港票房雖然一般，但外國啲影展就好鍾意部戲，唔知係咪因為拍得比較藝術呢？
荷李活大導史提芬史匹堡即將監製新片《藝伎回憶錄》，已經確定由鞏俐、章子怡同楊紫瓊合演，而張曼玉同華裔女星劉玉玲就名落孫山。導演張藝謀嘅兩個緋聞女友鞏俐同章子怡再次同演一部電影，馮仁昭覺得佢哋都幾有緣噃，聽講楊紫瓊日前重去咗德國試戲服㖭。
由鄭伊健同郭富城主演嘅電影《三岔口》，工作人員噚日凌晨一點幾，喺油麻地文苑街文輝樓對開拍攝一場落雨街景，其間警方接報聲稱有人喺上址大廈天台企圖跳樓，警員趕抵現場調查後，證實虛報，相信疑是大廈住客不堪聲浪滋擾難安睡而惡意虛報，拍攝工作之後繼續進行。
